14 – 16 noyabr tarixlərdə  Yüksək Texnologiyalar Parkında “Startup Günləri 2014” keçirilib.

Startup Günlərinin açılış mərasimində çıxış edən  Azərbaycan İnternet Forumunun  prezidenti , Startup Azərbaycan TK-nın üzvü  Osman Gündüz  Startup Günlərinin keçirilməsində əsas  məqsədin ölkənin milli startup infrastrukturun inkişafına dəstək vermək, yeni startupların yaradılmasını stimullaşdırmaq , startuplar üçün informasiya-metodiki dəstək göstərmək, yeni yaradılan dövlət qurumları tərəfindən startuplar göstəriləcək dəstək haqqında məlumatlar çatdırmaq və  startuplar arasında əlaqələrin gücləndirilməsindən ibarət olduğunu bildirib.

Açılış  mərasimində  Rabitə və İnformasiya Texnologiyaları nazirinin müavini Elmir Vəlizadə çıxış edərək, artıq startupların inkişafı istiqamətində dövlət tərəfindən ciddi addımların atıldığını, startuplara dəstək üçün müvafiq infrastrukturun yaradıldığını bildirib.  O, qarşıdakı illərdə də  milli startupların inkişafına dəstək göstərilməsinin  prioritet olduğunu qeyd edib və bu dəstəyin  daha da güclənəcəyini bildirib. Nazir  müavini bu cür tədbirlərin startup infrastrukturunun formalaşmasında mühüm əhəmiyyət kəsb etdiyini vurğulayıb.

Daha sonra Startup Günləri çərçivəsində “Milli startuplara dövlətin və özəl sektorun dəstəyi” mövzusunda konfrans öz işinə başlayıb.

Konfransda RİTN yanında İT-nin İnkişafı Dövlət Fondunun icraçı direktoru Elçin Zeynalov, Yüksək Texnologiyalar Parkının direktor müavini Cəlal Rəhimov,  Cybernet şirkətinin rəhbəri İlham Namazov, Khazar Ventures şirkətinin təsisçisi Məmməd Kərimov, Infipro şirkətinin nümayəndəsi Kəmalə İsmayılova,  SİNAM şirkətinin direktoru Elçin Əliyev, İnternet Holdinq şirkətinin rəhbəri Rafael Əzizov  çıxış ediblər.

Konfransda iştirak edən, “Infipro” şirkətinin Layihə Meneceri Kəmalə İsmayılova gənc startuplara, innovativ ideyalara dəstəyin Infipro şirkətinin daima diqqət mərkəzində olduğunu tədbir iştirakçılarının nəzərə çatdırmışdır. O, gənclərin təqdim etdiyi yeni ideyaların bazarın tələblərinə uyğunlaşdırılmasının vacibliyi vurğulayaraq ideyaların tətbiqi sahəsində öz tövsiyələrini vermişdir.

Çıxışlarda səsləndirilən fikirlər ətrafında və mövzu ilə bağlı maraqlı diskussiya keçirilib. Ölkənin startup infrastrukturunun bütün maraqlı tərəflərinin nümayəndələri müzakirələrdə aktiv iştirak diblər. Gənc startupçıları maraqlandıran suallar panel iştirakçılar tərəfindən cavablandırılıb. Sonra Konfrans müzakirələr və sual-cavablarla işini davam etdirib.